Þið sem eruð að fylgja mér á Instagram hafið líklegast eitthvað séð að við erum búin að vera í smá „framkvæmdum“ ef það má orða það þannig heima. Við keyptum okkur nýjan sófa eins og ég sagði frá í síðustu færslu og smá update: naglalakkið náðist úr haha. En við sem sagt fengum okkur nýjan sófa sem gjörbreytti stofunni og birti hana þvílíkt. Við skiptum líka um mottu og hún var mjög ódýr úr Ikea. Það er svo fyndið því það berst nánast alltaf til tals hvað mottan sé flott þegar einhver kemur í heimsókn til okkar og það kemur mörgum á óvart að hún sé úr Ikea. Við keyptum okkur nýtt sófaborð sem mig er búið að langa í í 2 ár núna. Ég sýndi frá því í einum óskalistanum sem ég gerði hérna á blogginu en ég skal setja inn aðra mynd af því hér, ég get ekki beðið eftir að það komi loksins en það geta verið 10 vikur í það!

Þetta er borðið, ég elska hvað það er klassískt og einfalt. Ég er með svart ljós yfir borðstofuborðinu og fæturnir á stofuborðinu munu passa vel við það. Ýttu hér fyrir link að borðinu. Ýttu hér fyrir link að sófanum. Ýttu hér fyrir link að mottunni.

Við erum núna að panta gardínur. Ég pantaði núna fyrir sumarið myrkvunargardínur í herbergin frá Álnabæ, það voru ennþá þær sem fylgdu íbúðinni og það voru rimlar. Ég bölvaði þeim allt fyrrasumar þar sem við gátum varla sofið fyrir birtu svo ég ákvað að vera snemma í því að panta núna fyrir þetta sumar. Núna er næst á dagskrá að panta gardínur fram í alrými. Mig langar í fallegar wave gardínur úr eins og hörlíki. Ég fann fyrirtæki í gegnum Instagram, gloryblindsiceland, og sendi á það að biðja um tilboð og ég fékk alveg geggjaða þjónustu. Það kom maður hingað frítt að mæla og kom með prufur sem ég fékk lánaðar yfir helgi. Verðið sem ég fékk fannst mér mjög sanngjarnt, sem skemmdi ekki fyrir. Ég setti inn á Instagram story í gær könnun um hvernig lit ég eigi að fá mér því ég er búin að vera að flakka á milli þess að fá mér hvítar eða beige. Ég held það sé komin lending núna, að ég velji beige. Ég get ekki beðið eftir að sjá útkomuna og mun að sjálfsögðu deila öllu hér.

Við náðum okkur líka í flísaprufur í Birgisson fyrir baðherbergið. Við erum í smá dilemmu með hvort við ættum að taka í gegn fyrst, eldhúsið eða baðherbergið. Bæði virka fullkomlega, bara smekksatriði frekar svo það liggur ekki á neinu. Ég hallast meira að því að gera eldhúsið því það er að mínu mati hjarta heimilisins og alltaf til sýnis en Oliver vill frekar byrja á baðinu. Ég er eiginlega búin að ákveða allt fyrir baðið og sé alveg fyrir mér allt svo það er kannski betra að byrja bara á því afþví að ég get ekki ákveðið í hvaða stefnu ég vil fara með eldhúsið, ég flakka á milli þess að vilja svart og hvítt.

Þetta er orðin svakaleg langloka hjá mér. Það verður greinilega nóg að gera í heimilsmálum á næstunni. Ég set mikið inn á Instagram og ætla að reyna að vera dugleg að pósta hingað inn líka af þeim málum. Ég er með margt á óskalista núna svo ég kannski hendi í slíkan hérna bráðum. Ég er búin að vera að prófa líka nokkrar uppskriftir svo þið megið eiga von á nokkrum nýjum núna næstu daga.

Í dag var ég í fríi í vinnunni og Emma var í fríi í leikskólanum vegna starfsdags. Við Emma fórum með vinkonum mínum í sveitina þar sem ein vinkona okkar býr með fjölskyldunni sinni í heimsókn. Þar voru beljur, hestar, kindur, hundur og litlir kettlingar.

Það var svo skemmtilegt hjá okkur í dag, Emma var alveg í skýjunum með daginn. Það er farið að vera svo gott veður, það stóð hæst 17° á mælinum í dag. Það var svo gott að komast aðeins út fyrir bæinn og vera úti í náttúrunni. Ég var með mígreni á fimmtudaginn og svo aftur í gær svo ég var mjög fegin að vera laus við það í dag og geta notið dagsins almennilega.

Ef þið eruð að fylgja mér á Instagram þá sáuð þið eflaust að ég hélt uppá afmælið mitt um helgina. Ég er algört afmælisbarn og elska að halda uppá og skipuleggja afmæli, ekki skemmdi heldur fyrir að það var Eurovision og svo kosningar. Þetta var svakaleg helgi. Ég var með svo sumarlega bollu í afmælinu sem ég fékk nokkrar fyrirspurnir um á Instagram. Ég ætla að deila uppskriftinni af henni hérna fyrir neðan. Það er kannski spes að vera að deila bolluuppskrift á mánudegi, en ég meina þá er hægt að græja það sem þarf í hana í vikunni og græja hana um helgina.

• 3 sítrónur skornar í sneiðar
• 2 dl vodka
• 1 freyðivíns flaska, ég notaði Asti Gancia
• 1 flaska límonaði
• 2 dl hindberjasíróp
• Nóg af klökum

Öllu hellt í stóra skál eða svona drykkjarílát eins og ég er með hérna á myndinni fyrir ofan og hrært varlega saman.

Gleðilegan mæðradag! Ég fékk að sofa út í morgun, mjög næs. Oliver fór fram með Emmu að sinna henni, ég hafði verið að baka langt fram á kvöld kvöldinu áður og hafði skilið eftir hrærivélaskálina í vaskinum. Oliver ákvað að vaska hana bara upp snöggvast svo að ég kæmi fram í allt hreint. Á meðan Oliver snéri sér við í mesta lagi 5 mínútur ákvað litla uppátækjasama Emma, við erum byrjuð að kalla hana Lottu, eftir Lottu í Skarkalagötu, að naglalakka sig. Hún bara fór og náði sér í naglalakk og hellti því yfir sig alla og í sófann! Það var sem betur fer glært naglalakkið sem hún valdi sér, en sófinn sem er ekki vikugamall er kominn með naglalakksblett í sig, alveg frábær byrjun á mæðradeginum haha.

Ég þarf því í dag að leita leiða til þess að ná þessu úr sófanum, ég þori ekki alveg að nota hvað sem er á hann. Við semsagt erum búin að vera með sama sófa heima síðan við bjuggum heima hjá mömmu. Mjög ljótur svefnsófi sem við fluttum bara með okkur hingað í nóvember 2020 því við vorum ekki búin að ákveða hvernig sófa okkur langaði í. Svo fundum við loksins sófa og þá var hann uppseldur og var það þar til núna einu og hálfu ári síðar. Ég var svo ánægð og keypti mér á sama tíma nýja mottu og nýtt sófaborð. Ég sýni betur frá þessu öllu þegar sófaborðið er komið, en það getur tekið alveg 14 vikur að koma. Ég hef þá smá tíma til þess að reyna að ná naglalakkinu úr.

• 275 gr púðursykur
• 3 egg
• 185 gr suðusúkkulaði
• 185 gr smjör
• 80 gr hveiti
• 40 gr kakó

Byrjað er á að þeyta saman púðursykur og egg. Síðan er smjörið og suðusúkkulaðið brætt saman og hellt útí eggjablönduna og blandað saman. Sigtið svo hveiti og kakó í líka og hrærið saman. Grófsaxið súkkulaði af eigin vali, ég saxaði niður restina af suðusúkkulaðinu og blandið í deigið. Bakið á 180° í 25 mínútur.

Á þriðjudaginn átti ég afmæli. Ég elska að eiga afmæli, reyndar elska ég bara afmæli yfir höfuð. Ég bauð mömmu, manninum hennar og bróður mínum í mat. Við grilluðum og höfðum það notalegt saman. Ég átti æðislegt kvöld með þeim. Ég fékk margar fínar gjafir, ég fékk nýja hlaupaskó, ræktarföt og kökuhníf sem var búinn að vera á óskalistanum til þess að nefna nokkra hluti. Svo mætti Hanna vinkona með gjöf handa mér í vinnuna, hún gaf mér kerti sem er búið að vera á óskalistanum mínum lengi úr Dimm, það er svo góð lykt af því. Ég er kertasjúk og þetta kerti setti ég á einn óskalistann hérna á blogginu. Ég ætla að halda svo almennilega uppá afmælið mitt seinna í mánuðnum þegar allir eru búnir í prófum og svona.

Við Oliver vorum með heima-deit á laugardagskvöldið fyrir afmælið mitt. Emma vildi gista hjá ömmu sinni og við ákváðum að vera bara heima í rólegheitum og slaka á þar sem við vorum ennþá þreytt eftir að hafa verið nýkomin heim frá Bandaríkjunum 2 dögum áður. Við keyptum kjúkling í marineringu og skelltum á grillið og höfðum svo aspas og kartöflur með. Ég er að elska góða veðrið sem er loksins komið, nú er hægt að fara að grilla og nota nýja Ooni ofninn. Ég setti inn á instagram mynd af kartöflunum sem ég hafði með og fékk nokkrar beiðnir um uppskrift svo ég ákvað að henda henni bara hingað inn. Mælieiningarnar í þessari uppskrift eru alls ekki heilagar, aðlagið bara að ykkar þörfum og hvað ykkur finnst gott.

• 1 kg kartöflur
• 100 gr smjör
• 4 hvítlauksrif
• 1 msk truffluolía
• parmesan
• salt og pipar

Byrjað er á að sjóða kartöflur þar til þær eru orðnar mjúkar í gegn. Þá er ofninn hitaður í 200°. Setjið kartöflurnar á bökunarplötu og notið botn á glasi til þess að kremja þær niður. Bræðið smjör og pressið hvítlauksrifunum út í smjörið og blandið saman. Leyfið smjörinu aðeins að standa og fá í sig hvítlauksbragðið áður en smjörinu er penslað yfir kartöflurnar. Kryddið með salt og pipar og setjið í ofninn í 10 mínútur. Þegar kartöflurnar koma úr ofninum er truffluolíunni hellt yfir og að lokum parmesan rifinn yfir.

Jæja, ég veit bara ekki hvar ég á að byrja, það er orðið svo langt síðan ég bloggaði síðast. Við fjölskyldan erum búin að vera síðustu tvær vikur í algjörri slökun í Orlando. Það var sjúklega næs að bara slaka á í sólinni og vera með fjölskyldunni. Við fórum 9 saman og vorum öll í sama húsinu, það var ótrúlega notalegt. Þetta var fyrsta utanlandsferðin hennar Emmu og við erum ennþá bara ekki að trúa hvað allt ferðalagið gekk vel með hana. Hún var svo dugleg að sofa í fluginu sem betur fer því þetta er 8 tíma flug.

Við komum svo heim í gærmorgun eftir næturflug. Það er alltaf svo gott að koma aftur heim eftir svona frí og fara í sína sturtu og sofa í sínu rúmi. Ég er í dag bara að dunda mér að ganga frá öllu dótinu sem við keyptum og þvo þvott. Emma fór í leikskólan í dag og Oliver í vinnuna. Emma var svo spennt að komast í leikskólan aftur að hitta alla krakkana að hún mátti varla vera að því að kveðja mig í morgun..

Ég hafði ætlað mér að setja inn apríl óskalista eins og ég vil byrja að gera mánaðarlega hérna á blogginu en ég er bara nýkomin heim úr verslunarferð þar sem var keypt allt of mikið af dóti svo ég er mjög hugmyndarsnauð af hlutum sem eru á óskalistanum þessa stundina. Ég á afmæli núna á þriðjudaginn og ég verslaði mér nokkrar gjafir sjálf úti. Ég er búin að vera dugleg að sýna frá ýmsu sem ég keypti úti á Instagram. Svo er ég með Florida highlight á Instagram hjá mér ef þið hafið áhuga á að skoða það. Ég mun líklegast sýna eitthvað frá afmælisundirbúning á þar líka.

Ég er spennt að vera komin heim í eldhúsið mitt og geta byrjað að setja uppskriftir hingað inn aftur. Ég keypti mér nokkrar uppskriftabækur úti sem ég er spennt að prófa að elda uppúr, kannski enda einhverjar hér ef þær eru góðar. Ég vildi bara setja smá innlegg hérna inn eða uppfærslu, ég ætla ekkert að hafa þetta eitthvað mikið lengra. Takk fyrir að lesa, mér þykir voða vænt um að sjá að margir eru að lesa bloggið þótt ég hafi ekki sett neitt inn í rúmlega tvær vikur.

Þessi kaka er fullkomin núna þegar er loksins farið að vora. Ég enduruppgötvaði á dögunum Silvíukökuna, sem er á blogginu, uppskrift hér. Ég bakaði hana í vinnunni tvisvar við miklar undirtektir, hún er svo létt og góð og allt öðruvísi en venjulegar kökur. Mér datt í hug að það gæti verið gott að gera smá tvist á Silvíuköku uppskriftina með því að breyta kreminu ofaná. Það heppnaðist bara ótrúlega vel og úr varð fullkomin vor/sumarkaka. Á sumrin í Svíþjóð er mikið boðið uppá jarðaberjatertur og finnst mér þessi uppskrift minna mig á svoleiðis.

Byrjað er á að þeyta saman egg og sykur þar til létt og ljóst. Bætið saman við vatninu og hækkið á kraftinum í hrærivélinni. Þegar þetta er allt orðið vel blandað þá er lækkað aftur í hrærivélinni og hveitinu og lyftiduftinu er bætt saman við. Hellið deiginu í smurt hringform og bakið við 175° í 30 mínútur.

• 2 dl rjómi
• 1 msk vanilludropar
• 3 Daim stykki
• 1 askja jarðaber

Þeytið rjómann og vanilludropa þar til rjóminn er farinn að mynda toppa. Fínsaxið Daim og jarðaber og hrærið varlega saman við rjómann með sleif. Dreifið yfir kökuna þegar hún er alveg búin að kólna og njótið.

Núna styttist heldur betur í Florida ferðina okkar fjölskyldunnar. Ég var í allan gærdag að undirbúa heimilið, að koma því í gott stand fyrir brottför og aðeins byrja að týna í töskur. Það var frekar týpískt að í morgun kl 5 vaknaði ég við ælugusu sem lenti að sjálfsögðu í rúminu. Það var mjög hressandi að þurfa að baða Emmu, sem bar ábyrgð á gubbinu, rífa af rúminu, setja í vél og djúphreinsa dýnuna allt fyrir kl 6 í morgun. Ég er að reyna að horfa samt á björtu hliðarnar og er fegin að þetta gerðist núna en ekki daginn sem við förum. Það verður svo gott að komast í frí, ennþá betra eftir þennan dag sem við erum búnar að eiga haha!

Ég fór í mat til mömmu á fimmtudaginn síðastliðinn. Við Emma fórum beint eftir vinnu til mömmu í Mosó og við erum búnar að vera þar í svona hálftíma þegar allt í einu labbar bróðir minn inn í stofu þar sem við erum, hann býr í Danmörku og ég hafði ekki séð hann síðan um jólin, og allt í einu birtist hann bara óvænt. Ég var vægast sagt í sjokki! Vá þetta var svo skemmtilegt að fá loksins að knúsa hann, það voru nokkur tár sem féllu þarna, mest frá mér haha. Mamma bauð svo uppá eitt besta lasagna sem ég hef fengið. Ég myndaði það fyrir bloggið og bað hana að senda mér uppskriftina sem er af sænskri síðu sem heitir Matplatsen. Ég ætla sko að skella í þetta lasagna um leið og við komum aftur heim frá Florida.

Hakkblandan

• 1 kg nautahakk
• 2 laukar
• 2 hvítlauksgeirar
• 4 dl hakkaðir tómatar
• 2 dl vatn
• 1 msk dijon sinnep
• 2 msk fljótandi nautakraftur
• 1 grænmetisteningur
• 2 msk soya

Brúnið laukinn á pönnu og bætið svo hakkinu út á. Þegar hakkið er orðið eldað þá er restin af hráefnunum bætt við og leyft að malla í 45 mínútur.

Bechamel

• 100 gr smjör
• 0.75 dl hveiti
• 5 dl mjólk
• 3 dl rjómi
• 5 dl rifinn ostur

Bræðið smjör og bætið hveitinu saman við og hrærið í smjörbollu. Bætið svo rest við og hrærið þar til osturinn er bráðnaður. Kryddið með salt og pipar.

Annað

• Lasagnaplötur
• Rifinn ostur yfir lasagnað

Raðið lasagnaplötu, hakki og bechamel til skiptis í eldfast mót og toppið með osti, eldið í 35 mínútur í miðjum ofni á 200°. Leyfið svo aðeins að standa áður en borið er fram. Berið fram með góðu salati, parmesan og hvítlauksbrauði.

Nei nú held ég að ég hafi búið til bestu köku sem ég hef nokkurntíman gert! Ég held ég sé ekki einu sinni að ýkja. Ég sá þessa köku á Instagram hjá breskri konu sem heitir Jane Dunn og ég bara varð að prófa sjálf, þetta gat ekki klikkað. Ég elska Mini Eggs frá Cadbury, þau eru það sem ég á erfiðast með að standast yfir páskana. Þegar ég sá köku þar sem þau voru aðal innihaldið þá stóðst ég ekki mátið, ekki nóg með það er ostakaka uppáhaldið mitt líka.

Kexbotn

• 1 pakki Digestive kex (400 gr)
• 200 gr smjör

Myljið kexið í matvinnsluvél og blandið saman við bræddu smjöri. Þrýsið blöndunni í botninn á smelluformi og setjið í kæli.

Fylling

• 500 gr rjómaostur
• 2 dl flórsykur
• 1 tsk vanilludropar
• 1 plata Cadbury mjólkursúkkulaði (hægt að nota hvaða súkkulaði sem er)
• 3 dl rjómi
• 2 pokar af Mini Eggs (í fyllinguna, ég notaði svo annan ofaná kökuna sem skraut)

Byrjað er á að bræða súkkulaðið í örbylgjuofni, ég vil nota Cadbury súkkulaðið því það er sama súkkulaðið og er í eggjunum en það má auðvitað nota hvaða súkkulaði sem er. Leyfið súkkulaðinu aðeins að kólna og á meðan þeytið saman rjómaostinn, flórsykurinn og vanilludropana. Þegar súkkulaðið er aðeins búið að fá að standa er því hellt saman við rjómaostablönduna og þeytt vel. Bætið rjómanum í rjómaostablönduna og þeytið þar til blandan er orðin þykk, passið samt að ofþeyta ekki. Ég notaði matvinnsluvél til þess að hakka niður Mini Eggin og blandaði þeim varlega saman við fyllinguna með sleif. Hellið svo fyllingunni yfir kexbotninn og leyfið að standa í ísskáp í að minnsta kosti 4 klst, best yfir nótt. Skreytið svo með fleiri Mini Eggs eða í raun hverju sem er.

Þegar ég var yngri þá elskaði ég rúllutertur, þær voru uppáhaldið mitt. Ég man hvar ég var þegar ég smakkaði hana fyrst og allt, án þess að reyna að hljóma dramatísk! Ég var í bústað með fjölskyldunni minni á Akureyri og mamma keypti rúllutertu frá Kristjáns Bakarí. Ég hef verið um 10 ára og ég hafði bara aldrei á ævinni smakkað neitt jafn gott. Ég gerði þessa rúllutertu með kærastann og mág minn í huga en þeir elska Þrista. Mér datt í hug að það gæti verið gott að setja einhversskonar nammifyllingu í rúllutertu og það var bara alls ekki slæm hugmynd þó ég segi sjálf frá.

• 3 egg
• 1.5 dl sykur
• 0.75 dl hveiti
• 2 msk kakó
• 1 tsk lyftiduft
• 2 dl rjómi
• 1 poki af Þrist

Byrjað er á að kveikja á ofninum á 225° blástur. Þeytið eggin og sykurinn saman þar til létt og ljóst og sigtið þá í þurrefnin. Hrærið þurrefnunum saman við eggjablönduna með sleif þar til orðið er slétt deig. Setjið smjörpappír á ofnplötu og dreifið deiginu yfir. Bakið inni í ofni í 5-7 mínútur. Takið ofnplötuna út og leyfið kökunni alveg að kólna. Ég rúllaði minni upp á meðan hún var heit, ennþá með pappírnum á svo hún myndi kólna í rúllu og koma þannig í veg fyrir sprungur. Stífþeytið rjóman og blandið varlega saman við með sleif fínhökkuðum Þristum. Passið að botninn sé alveg kaldur áður en þið dreifið rjómanum yfir. Setjið þunnt lag yfir allan botninn og rúllið honum svo varlega upp og takið pappírinn frá. Sigtið flórsykri yfir og berið fram.

Í gær fékk ég mikla löngun í nákvæmlega þennan rétt. Það er svo langt síðan ég gerði hann síðast. Ég er með svipaða uppskrift á blogginu að grískum bollum með tzatziki sem er líka mjög góð en mig langaði frekar í þessa. Mér finnst þessi uppskrift vera svona ekta heimilismatur sem auðvelt er að græja eftir vinnu. Emma hámaði í sig matinn sem er alltaf merki um góð meðmæli frá henni.

Ég er allt í einu svo ótrúlega spennt fyrir blogginu, loksins búin að stíga almennilega upp úr þessari blogglægð sem ég er búin að vera í, sem hafði að miklum hluta með orkuleysi að gera eftir covid. Ég er með fullt af hugmyndum og ég get ekki beðið eftir að deila þeim öllum með ykkur!

Kjötbollur

• 500 gr nautahakk
• 2 egg
• 2 dl brauðrasp
• 1 bréf púrrlaukssúpa
• 2 dl steinselja
• ólífuolía til að steikja uppúr

Öllum hráefnunum er hnoðað saman þar til allt er vel blandað. Þá er hakkblöndunni rúllað í kúlur svo myndist kjötbollur, ég vil hafa mínar stærri en hefðbundnu sænsku bollurnar en það er bara smekksatriði. Olía er hituð á pönnu og þegar hún er orðin heit er bollunum skellt á og velt um pönnuna þar til þær eru orðnar brúnar á öllum hliðum. Þá eru þær teknar til hliðar, af pönnunni á meðan sósan er gerð.

Sveppasósa

• 100 gr smjör
• 1 askja af sveppum
• 3 dl rjómi
• 1 nautateningur
• salt og pipar
• sósujafnari og sósulitur (má sleppa)

Setjið smjör á pönnuna og bræðið það. Setjið sveppina, saxaða, út á smjörið og leyfið þeim að steikjast uppúr smjörinu. Þegar sveppirnir eru búnir að malla í smjörinu í um 5 mínútur þá er rjómanum hellt út á og leyft að ná suðu. Bætið teningnum út í sósuna og kryddið eftir smekk. Ef þið viljið getið þið notað sósujafnara og/eða sósulit. Setjið svo bollurnar aftur í pönnuna, ofaní sósuna og leyfið að malla saman í nokkrar mínútur. Berið fram með kartöflum og sultu.