Núna um helgina ætlum við bara að taka því rólega. Á fimmtudaginn vorum við vinkonurnar með babyshower fyrir Mörtu vinkonu okkar sem heppnaðist ótrúlega vel. Við leyfðum Emmu að vera heima með okkur í gær að hafa, eins og hún segir, kósí. Núna er hún komin í pössun til ömmu sinnar og langaði mig að baka eitthvað einfalt til að eiga yfir helgina og mundi ég þá eftir þessari uppskrift. Ég hélt ég væri búin að deila henni hér en þessari uppskrift deildi ég í Vikunni sem ég var í í september. Ég mæli með að prófa þessa uppskrift, hún er ótrúlega einföld en líka svolítið öðruvísi.

• 2 bollar flórsykur
• 1 bolli hveiti
• 2/3 bolli kakó
• 1 tsk salt
• 3 eggjahvítur
• 1 msk vanilludropar
• 2 msk kælt kaffi
• 1 dl súkkulaðidropar
• valhnetur
• gróft salt

Blandið saman öllum þurrefnum (ekki valhnetum og grófu salti). Hrærið síðan eggjahvítunum, vanilludropunum og kaffinu saman við og síðast súkkulaðidropana. Setjið deigið í kæli í 30 mín og rúllið því síðan upp í u.þ.b. 12-15 kúlur. Veltið kúlunum upp úr söxuðum valhnetum og raðið á bökunarplötu og bakið á 175°C í 15 mín. Gott er að strá smávegis grófu salti yfir klattana þegar þeir koma úr ofninum.

Þessi réttur er án efa einn af mínum uppáhalds. Þessi er svona algjört „comfort food“. Ég setti inn á Instagram um daginn þegar ég var að útbúa þennan rétt og fékk þónokkrar fyrirspurnir um uppskrift svo hér er hún. Þessi uppskrift miðast við tvo.

• 2 kjúklingabringur
• 2 egg
• hveiti
• brauðrasp
• 3-4 greinar af salvíu
• 4 hvítlauksgeirar
• olía

Byrjað er á að skera bringurnar þvert á lengdina (til þess að þynna þær og fá 4 bita). Síðan er gott að berja þær niður til þess að fá þær extra þunnar. Síðan er bringunum velt upp úr hveitinu, síðan eggjunum og svo raspinum. Síðan er sett olía í pönnu, botnfylli (ca 1-2 cm upp pottinn) af olíu. Byrjað er að setja hvítlaukinn í og svo salvíuna. Síðan er kjúklingurinn settur í olíuna og steiktur þar til hann fær fallegann lit.

• 125 gr tagliatelle
• 50-80 gr smjör
• parmesan
• pastavatn

Byrjað er á að sjóða pastað eins og leiðbeiningar sýna. Mér finnst best að sjóða í 2 mínútur styttra en tíminn á pakkningunni segir til þar sem það mun fara á pönnu og verða mýkra. Mikilvægt er að salta vatnið vel (heila lúku). Takið svo smá af pastavatninu til hliðar áður en því er hellt frá pastanu. Smjör er brætt á pönnu á vægum hita. Þegar það er alveg brætt er hitinn hækkaður aðeins og ca bolli af pastavatninu er bætt útá. Því er leyft að malla saman en hrært á meðan. Þegar þetta er búið að fá að malla aðeins og búið að blandast saman er pastanu hellt út á. Síðan er nóg af parmesan sett í, ég set alveg tvær fullar lúkur og hrært saman við þar til hann er bráðnaður í. Þá er tilbúið ekta ítalskt pasta Alfredo. Síðan er þetta borið fram með kjúklingnum og gott er að hafa sítrónu með líka

Ég er ekki mikil ís manneskja, ég myndi yfirleitt alltaf velja frekar nammi. Hinsvegar ef ég ætti að velja mér uppáhalds ís þá væri það án efa hnetutoppur frá Emmess. Þegar ég sá að Emmess væri byrjað að selja bara hnetukurlið í búðum þá vissi ég að ég þyrfti að baka eitthvað úr því. Ég fór í smá hugmyndavinnu og datt svo í hug að sameina tvö uppáhöld, hnetukurl og kókoskúlur!

• 100 gr mjúkt smjör
• 1 dl sykur
• 1 tsk vanillusykur
• 2 msk kakó
• 3 dl haframjöl
• 2 msk kælt kaffi
• poki af hnetukurli

Hrærið smjör og sykur saman þar til blandan verður ljós og létt. Bætið vanillusykri, kakó, haframjöli og kaffi saman við og vinnið vel saman. Rúllið litlar kúlur úr deginu og veltið þeim upp úr kókosmjöli. Geymið kókoskúlurnar í ísskáp.

Þessi súpa er fullkomin haustsúpa að mínu mati. Hún er fljótgerð og það þarf ekkert að hafa fyrir henni. Ég hef gert hana með allskonar grænmeti sem er á síðasta snúning og hún er alltaf jafn góð. Ég gerði hana í fyrradag fyrir Oliver sem er ennþá bara á fljótandi og notaði þá líka gulrætur sem var líka mjög gott. Oliver setur smá tabasco útí en hann vill hafa súpuna extra sterka, svo það er smá tips frá honum fyrir þá sem eru fyrir sterkan mat.

• 1 laukur
• 6 tómatar
• 1 rauð paprika
• 5 hvítlauksrif
• basilika
• salt og pipar
• ólífuolía
• 1 msk rjómi
• 1 msk balsamik- gljái
• grænmetisteningur
• chiliflögur eftir smekk
• cayenne pipar

Skerið niður grænmetið og setjið það í eldfast mót með ólífuolíu, salti og pipar. Eldið í ofni í 30 mín. við 220°C. Fylgist vel með því. Grænmetið er tilbúið þegar kominn er smávegis litur á laukinn og grænmetið hefur mýkst. Setjið grænmetið í blandara og maukið saman, einnig er hægt að nota töfrasprota. Hellið blöndunni í pott með smávegis olíu, rjómanum, balsamikgljáa, grænmetisteningnum og kryddum og leyfið að malla. Sleppið cayenne- piparnum ef þið viljið ekki hafa súpuna sterka. Smakkið til og bætið við eftir smekk. Berið súpuna gjarnan fram með balsamikgljáa og basiliku. Hægt er að leika sér mikið með þessa uppskrift og hafa til dæmis sýrðan rjóma, parmesan-ost eða súrdeigsbrauð með.

Á mánudaginn er kanelbullens dag í Svíþjóð eða „kanilsnúðadagurinn“. Þá er algjört möst að gera sér smá dagamun og fá sér snúð. Hér er uppskrift af ekta sænskum kanilsnúðum og var hún mjög einföld.

Kanilsnúðar

• 50 gr ger
• 50 gr smjör
• 3 dl mjólk
• 1/2 dl sykur
• 7 dl hveiti

Byrjað er á að bræða smjörið og hella mjólkinni útí og blanda saman. Blandan er hituð þannig hún sé volg (ca 37°). Gerinu er hellt útí og leyst upp. Síðan er þurrefnum blandað saman við vel og viskastykki sett yfir og látið standa í 30 mínútur.

Fylling

• 50 gr mjúkt smjör
• 1/2 dl sykur
• 2 tsk kanill

Öllum hráefnum blandað vel saman.

Síðan er deigið flett út á borðflöt sem er búið að dreifa á hveiti. Deigið á að vera um 30x40cm. Svo er fyllingunni dreift yfir og deiginu rúllað upp og skorið í ca 20 bita. Svo er snúðunum raðað á bökunarplötu og aftur sett viskastykki yfir í ca 20 mínútur. Svo er penslað eggi yfir snúðana og hellt perlusykri yfir. Bakað í miðjum ofni á 250° í 8 mínútur.

Oliver fór í kjálkaaðgerð síðasta fimmtudag, sem þýðir það að hann er víraður saman í 4 vikur. Hann var búinn að bíða eftir aðgerðinni í marga mánuði en hún var búin að frestast oft vegna Covid. Núna er ég því bara að elda fyrir mig og Emmu því hann má ekki borða neitt, bara drekka. Ég ákvað í gærkvöldi að baka þessar möffins, en ég hef ekki viljað baka neitt þar sem Oliver getur ekki smakkað. Hinsvegar þá vissi ég að þessar möffins myndu ekki freista hans of mikið þar sem hann er ekki mikið fyrir ber né sítrónu, og sló ég því til og sé alls ekki eftir. Namm hvað þessar eru góðar!

Bláberjamöffins

• 2 egg
• 2 dl sykur
• 3 dl hveiti
• 1 1/2 tsk lyftiduft
• 2 tsk vanillusykur
• 50 gr brætt smjör
• 1 1/2 dl mjólk
• 100 gr bláber

Byrjað er að hræra saman egg og sykur þar til létt og ljóst. Síðan er restinni af þurrefnunum blandað saman við og að lokum smjörinu og mjólkinni. Þegar deigið er tilbúið er bláberjunum hrært saman við. Síðan er deigið sett í form og bakað á 200° í 20 mínútur.

Sítrónu rjómaostakrem

• 100 gr rjómaostur (við stofuhita)
• 50 gr smjör (við stofuhita)
• 150 gr flórsykur
• 1 tsk sítrónusafi
• smá sítrónubörkur

Rjómaostinum og smjörinu er þeytt saman og þegar það er vel blandað er flórsykrinum bætt saman við. Þegar allt er orðið vel blandað er sítrónusafanum hellt út í ásamt berkinum. Síðan er kreminu sprautað á möffinskökurnar.

Þessi uppskrift er sjúklega góð og valdi ég þess vegna að hafa hana í Vikunni þar sem ég gaf nokkrar uppskriftir. Þessar bollur eru algjör snilld til þess að bera fram á veisluborði eða í saumaklúbbi til dæmis.

Grískar kjötbollur

• 600 gr nautahakk
• 1 dl brauðrasp
• 1 egg
• 2 msk eplaedik
• 2 msk ólífuolía
• 1 rauðlaukur, fínsaxaður
• 1 hvítlauksrif, pressað
• 1/2 dl söxuð steinselja
• 1/2 dl saxað dill
• 1 tsk oreganó
• salt og pipar
• hveiti til þess að velta bollunum uppúr
• olía til að steikja upp úr

Fínsaxið laukinn, steinseljuna og dillið. Blandið síðan öllum hráefnunum í eina skál (nema síðastnefnda) og best er að nota hendurnar við það. Búið til bollur úr blöndunni og setjið í kæli í a.m.k. 30 mín. Veltið síðan bollunum upp úr hveiti, dustið umfram hveitið af og steikið bollurnar upp úr olíu. Olían á að ná að þekja u.þ.b. hálfa bolluna. Steikið á miðlungshita þar til kjötbollurnar hafa fengið góðan lit, eða í um 3 mín. á hvorri hlið. Þerrið olíu af þeim með eldhúspappír og berið fram.

Tzatziki

• 350 gr grísk jógúrt
• 1 agúrka
• 1 hvítlauksrif (pressað)
• 1 msk sítrónusafi
• 1/2 msk ólífuolía
• 1 msk dill
• smá sjávarsalt

Byrjað er á að rífa niður heila gúrku. Svo er vatnið sigtað frá gúrkunni og gúrkunni pressað niður í sigtið til þess að losa allan umfram vökva. Síðan er öllum hráefnum blandað saman og sósan sett í kæli þar til borin fram.