Djúsí súkkulaðikaka

Þessi kaka er tilvalin að gera fyrir helgina. Hún er ótrúlega bragðgóð og mjúk.

Hráefni í kökuna

  • 2 bollar sykur
  • 2 bollar hveiti
  • 1 1/4 bolli kakó
  • 1 1/2 tsk matarsódi
  • 1 1/2 tsk lyftiduft
  • 1 tsk salt
  • 1/4 tsk kanill
  • 1 bolli mjólk
  • 2 egg
  • 1/2 bolli olía
  • 1 bolli heitt vatn
  • 1 teskeið af instant kaffi
  • 1 1/2 tsk vanilludropar

Aðferð

Byrjað er á að hita ofninn í 175°. Blandað er vel saman þurrefnum í skál. Síðan er eggjunum og mjólkinni bætt við og hrært saman. Síðan er heita vatninu og kaffinu blandað saman og sett í blönduna ásamt olíunni og vanilludropunum. Þessu er öllu hrært saman en passa þarf að hræra ekki of mikið. Ég setti deigið í 2 hringform en hægt er að setja í eitt dýpra eða í skúffu. Bakað í 35-40 mínútur eða þar til prjónn kemur hreinn úr kökunni.

Hráefni í súkkulaðiganache

  • 200 gr af suðusúkkulaði (má vera annað súkkulaði t.d. mjólkur eða hvítt)
  • 1 bolli rjómi

Aðferð

Rjóminn er settur í pott og hitaður á miðlungs hita þar til suðan fer að koma upp. Þá er rjómanum hellt yfir súkkulaðið og látið standa í 2 mín. Síðan er þessu hrært saman þar til súkkulaðið er allt bráðið. Ef blandan er of þunn þá er meira súkkulaði bætt við. Til þess að fá ganache-inn stífari er hann settur í smá stund inn í ísskáp. Þegar kakan er búin að kólna má setja ganache-inn á. Ég setti síðan kókosmjöl yfir en það er bara smekksatriði hvernig og hvort maður vilji skreyta.

Silvíukaka

Þessi kaka er ótrúlega einföld og fljótleg. Ég held að margir eigi til öll hráefnin í hana. Þessa köku gerði mamma ótrúlega oft þegar ég var yngri en hún er uppáhalds kaka sænsku drottningunar, Silvíu.

Hráefni í köku

  • 2 egg
  • 2 dl sykur
  • 1 dl vatn
  • 2 dl hveiti
  • 2 tsk lyftiduft

Hitið ofninn í 175°. Hrærið egg og sykur saman þar til létt og ljóst. Bætið vatninu saman við og hrærið snögglega. Bætið hveiti og lyftidufti út í og hrærið þar til deigið verður slétt. Setjið deigið í smurt bökunarform og bakið í ca 30 mínútur.

Hráefni í glassúr

  • 75 gr smjör
  • 1 dl sykur
  • 2 tsk vanillusykur
  • 1 eggjarauða
  • Kókósmjöl (strá yfir glassúr)

Á meðan kakan er í ofninum er glassúrinn gerður. Bræðið smjörið í litlum potti við vægan hita og hrærið sykri, vanillusykri og eggjarauðu saman við.

Þegar kakan er tilbúin er glassúrinn breiddur yfir kökuna og kókosmjöli stráð yfir.

Hnetusmjörskökur

Ég sá uppskrift af þessum kökum á tiktok og ákvað að prófa. Það sem heillaði mig var það að bæði voru rosalega fá hráefni sem þurfti, ég átti allt til í þær, síðan eru þær rosalega fljótgerðar og svo elska ég hnetusmjör. Ég bætti við smá heslihnetum ofaná til þess að gera þær aðeins betri (að mínu mati) en það er alveg hægt að sleppa því.

Hráefni

  • 1 bolli púðursykur
  • 1 bolli hnetusmjör
  • 1 tsk matarsódi
  • 1 egg
  • súkkulaðidropar eftir smekk
  • heslihnetur eftir smekk

Aðferð

Byrja á að kveikja á ofninum á 175° blástur. Síðan er öllum hráefnum blandað vel saman, ég setti heslihneturnar bara á toppinn á kökunum en ekki í deigið. Svo er deiginu skipt í ca. 12 kúlur og raðað á plötu með bökunarpappír og kúlurnar eru klesstar niður (mikilvægt því annars verða þær of þykkar). Síðan er heslihnetunum stráð yfir og þrýst aðeins ofaní deigið til þess að þær haldist. Síðan er þessu skellt inn í ofn í 15 mínútur. Síðan þurfa kökurnar aðeins og fá að standa og kólna eftir að þær eru bakaðar til þess að þær haldi sér.

Kókoskúlukaka

Í Svíþjóð er eitt uppáhaldið mitt „chokladboll“ eða á íslensku „kókoskúla“. En í Svíþjóð tíðkast oft að rúlla kókoskúlunum upp úr perlusykri frekar en kókos, sem mér þykir betra. Þá er í raun enginn kókos í kókoskúlunni og er því eiginlega betra að kalla þetta eins og Svíarnir bara „chokladboll“, eða súkkulaðikúla!

Ég sá uppskrift hjá sænskri stelpu sem heitir Frida að þessari köku og varð að sjálfsögðu að prófa. Hún var mjög einföld og fljótleg en kakan þarf ekki að bakast í ofni og geymist líka vel í kæli.

Hráefni í kökuna

  • 200 gr mjúkt smjör
  • 1 dl uppáhellt kaffi (kælt)
  • 2 dl sykur
  • 8 dl hafrar
  • 1 dl kakó
  • 2 tsk vanillusykur
  • smá salt
  • perlusykur (í skreytingu)

Allt er hnoðað saman í hrærivél í nokkrar mínútur eða þar til allt er blandað vel saman. Þá er deiginu þrýst í form sem búið er að setja plastfilmu í. Ef maður vill skreyta kökuna með kúlum þá tekur maður ca 3 msk af deiginu til hliðar fyrir það. Kakan er sett í frysti í 30 mín til að ná að stífna, eða ef hún er gerð daginn áður er nóg að setja í kæli.

Hráefni í súkkulaðikrem

  • 100 gr mjólkursúkkulaði
  • 1/2 dl rjómi

Byrjað er á að setja rjómann í pott á meðalháann hita. Þegar rjóminn hefur hitnað er súkkulaðinu hellt útí og hrært þar til það er bráðnað. Þá er potturinn tekinn af hellunni og blandan látin kólna.

Þegar kakan er tekin úr frysti/kæli er plastfilman fjarlægð, kanturinn er rúllaður uppúr perlusykri og kakan sett á disk. Síðan er súkkulaðinu hellt yfir og flott að setja aðeins út fyrir kantana. Svo er rjóma sprautað á (ekki nauðsynlegt) og að lokum skreytt með kúlunum. Gott er að hafa ber með til að jafna út bragðið. Látið kökuna standa við stofuhita í amk 15 mín áður en hún er borin fram.