Tengdamamma mín gerir svo gott döðlugott. Hún gerir það fyrir öll tilefni og eru jólin engin undantekning. Við horfðum saman á Jólagesti Björgvins á laugardagskvöldið og skelltum í bæði döðlugott og rocky road á meðan. Þetta er svo sjúklega ávanabindandi, maður getur ekki hætt að laumast í.
- 250 gr döðlur
- 100 gr púðursykur
- 150 gr smjör
- 2 pakkar lakkrísreimar
- 2 bollar rice krispies
- 300 gr suðusúkkulaði
Byrjið á því að hakka döðlurnar í matvinnsluvél. Síðan er döðlunum hellt í pott með púðursykrinum og smjörinu og hrært þar til smjörið er alveg bráðnað. Skerið lakkrísreimarnar í bita og bætið þeim í pottinn og hrærið saman við. Svo er Rice Krispies hrært saman við og slökkt undir hellunni. Hellið Rice Krispies blöndunni í form klætt bökunarpappír. Leyfið þessu að kólna í ísskáp áður en súkkulaðið er brætt og dreift yfir. Þegar súkkulaðið hefur harðnað er döðlugottið skorið í bita. Mér finnst langbest að geyma í kæli.
Malín Örlygsdóttir 